slider
slider
slider
slider
slider
slider
slider

Հասցե. 0004 ք. Երևան, Ծովակալ Իսակովի պող. 24

Հեռ. (+37410) 77 77  10

Էլ. փոստ info@nbe.am

Կայք. www.nbe.am

     Հարգելի այցելու, 
     Ողջունում եմ Ձեզ Հայաստանի Հանրապետության գիտությունների ազգային ակադեմիայի «Փորձաքննությունների ազգային բյուրո» պետական ոչ առևտրային կազմակերպության պաշտոնական կայք էջում: Հուսով եմ այստեղ Դուք կգտնեք Ձեզ հետաքրքրող հարցերի վերաբերյալ անհրաժեշտ տեղեկատվությունը, կծանոթանաք «Փորձաքննությունների ազգային բյուրո» ՊՈԱԿ-ի կառուցվածքին, հիմնական գործառույթներին և փորձագիտական հնարավորություններին՝ կատարվող փորձաքննությունների տեսակներին և ենթատեսակներին, փորձագիտական բնագավառի տարբեր ոլորտների հետազոտությունների նոր մեթոդների կիրառման վերաբերյալ տեղեկատվությանը և նորություններին: Կայք էջում զետեղված տեղեկատվությունը հնարավորություն կտա ճիշտ կողմնորոշվել ինչպես քրեական հետապնդում և արդարադատություն իրականացնող մարմիններին՝ իրենց գործառույթների իրականացման ընթացքում, այնպես էլ իրավաբանական և ֆիզիկական անձանց՝ իրենց իրավունքների պաշտպանության ընթացքում փորձագիտական ծառայության հնարավորություններից լիարժեք օգտվելու հարցերում:
     Ցանկանում եմ ընդգծել, որ «Փորձաքննությունների ազգային բյուրո» ՊՈԱԿ-ը, հանդիսանալով նաև դատափորձագիտական ինստիտուտների Եվրոպական ցանցի (ENFSI) լիիրավ անդամ, իր ողջ թիմով մշտապես նպատակամղված է կատարելագործել և զարգացնել դատափորձագիտական բնագավառի հնարավորությունները մեր երկրում՝ ապահովելու համար միջազգային մակարդակի փորձագիտական արդի հնարավորությունների ներդրումը Հայաստանի Հանրապետությունում:

director

Արգամ Նորայրի Հովսեփյան

«Փորձաքննությունների ազգային բյուրո» ՊՈԱԿ-ի տնօրեն, բ.գ.թ.

Լրահոս

news

Լույս է տեսել Փորձաքննությունների ազգային բյուրոյի քրեաբանության կիրառական հիմնախնդիրների գիտահետազոտական կենտրոնի հերթական աշխատությունը}

Լույս է տեսել ՀՀ ԳԱԱ «Փորձաքննությունների ազգային բյուրո» ՊՈԱԿ-ի քրեաբանության կիրառական հիմնախնդիրների գիտահետազոտական կենտրոնի հերթական աշխատությունը՝ մենագրությունը, որը նվիրված է ՀՀ-ում նորմատիվ իրավական ակտերի նախագծերի քրեաբանական փորձաքննության իրավական հիմքերի վերլուծությանը և կատարելագործման ուղիներին:

Մենագրության հեղինակը քրեաբանության կիրառական հիմնախնդիրների գիտահետազոտական կենտրոնի պետ, իրավաբանական գիտությունների թեկնածու, դոցենտ Գևորգ Իսրայելյանն է: Աշխատությունում մասնավորապես, լուսաբանված է հանցավորությունը պայմանավորող իրավական բնույթի գործոնները և դրանց կանխարգելման միջոցները, քրեաբանական փորձաքննության էությունը և տեսակները, նորմատիվ իրավական ակտերի քրեաբանական փորձաքննության վերաբերյալ տեսական մոտեցումները, միջազգային փորձը, ինչպես նաև ներկայացված են փորձաքննության իրավական հիմքերի վերլուծության արդյունքները, գործող իրավակարգավորումներում առկա բացերը, դրանց շտկման և նոր կարգավորումների իրականացման առաջարկություններ:

Հրատարակությունն օգտակար կլինի քրեաբանության հարցերով հետաքրքրվող մասնագետների համար:

news

Նոր Արեշ փողոցում տեղի ունեցած պայթյունի դեպքով նախաձեռնված քրեական վարույթի շրջանակներում նշանակվել և իրականացվում է համալիր փորձաքննություն}

Երևան քաղաքի Նոր Արեշ փողոցում փետրվարի 5-ին տեղի ունեցած պայթյունի դեպքի առթիվ նախաձեռնված քրեական վարույթով ԳԱԱ «Փորձաքննությունների ազգային բյուրո» ՊՈԱԿ-ում նշանակված համալիր պայթյունատեխնոլոգիական, պայթյունատեխնիկական, հրդեհատեխնիկական, ճարտարագիտատեխնիկական, շինարարատեխնիկական և ապրանքագիտական հանձնաժողովային փորձաքննության շրջանակներում, քրեական վարույթի համար նշանակություն ունեցող մի շարք հանգամանքների՝ այդ թվում պայթյունի օջախի, պայթյունի մեխանիզմի և առաջացման պատճառի պարզման նպատակով իրականացվում են բազմակողմանի հետազոտություններ:

Հաշվի առնելով դեպքի առանձնահատկությունները, փորձաքննությունների կատարմանը ներգրավվել են Բյուրոյի համապատասխան բնագավառների առաջատար փորձագետները, դեպքի վայրում կատարվել են անհրաժեշտ փորձագիտական ծավալուն հետազոտություններ՝ նաև նորարարական գերժամանակակից տեխնիկական միջոցների կիրառմամբ:

Մասնավորապես գործարկվել է դեպքի վայրի հետազոտման համար կիրառվող լազերային սկանավորման գերժամանակակից եզակի սարքավորումային համալիրը, ինչը հնարավորություն է տալիս բարձր ճշգրտությամբ արձանագրել դեպքի վայրի իրադրությունը, ստանալ պայթյունի հետևանքների ամբողջական պատկերները և անհրաժեշտ բոլոր ճշգրիտ չափային տվյալները նաև 3D ձևաչափով՝ ապահովելով փորձագիտական հավաստի արդյունքներ:

Նման բազմակողմանի հետազոտությունների մանրակրկիտ և լիարժեք իրականացումը կարևոր է ոչ միայն վարույթի համար նշանակություն ունեցող հանգամանքների պարզման նպատակով, այլ նաև կանխարգելիչ միջոցառումների իրականացման առումով՝ նմանօրինակ դեպքերի առաջացման հնարավոր պատճառների լիարժեք բացահայտման և վերլուծության համատեքստում:

news

Փորձաքննությունների ազգային բյուրոյում ներդրվել են փորձագիտական սխալների կանխարգելման արդյունավետ մեխանիզմներ}

ԳԱԱ «Փորձաքննությունների ազգային բյուրո» ՊՈԱԿ-ի ներկայացուցիչները՝ ղեկավար Արգամ Հովսեփյանի գլխավորությամբ, հունվարի 19-ին տեսակապի միջոցով մասնակցել են Մոսկվայի Կուտաֆինի անվան պետական իրավաբանական ակադեմիայի կազմակերպած «Դատափորձագիտական սխալներ. առաջացման, հայտնաբերման և կանխարգելման ժամանակակից խնդիրները» թեմայով միջազգային գիտագործնական համաժողովին:
Միջոցառմանը մասնակցում էին դատափորձագիտական բնագավառի առաջատար փորձագետներ, գիտնականներ և իրավապահ մարմինների ներկայացուցիչներ Ռուսաստանից, Բելառուսից և այլ երկրներից:
Համաժողովի ընթացքում ներկայացվել են զեկույցներ դատափորձագիտական ոլորտի տարբեր բնագավառներում ի հայտ եկող փորձագիտական սխալների համակարգային վերլուծության և դրանց կանխարգելմանն ուղղված մի շարք արդիական հարցերի վերաբերյալ, այդ թվում՝ փորձագետի կողմից ակնհայտ կեղծ եզրակացություն տալու հանցակազմին առնչվող տեսական և գործնական հիմնախնդիրները, դատավարական բնույթի փորձագիտական սխալները, մասնավոր փորձագետների կողմից առավել հաճախ թույլ տրվող փորձագիտական սխալները, մեթոդաբանական բնույթի փորձագիտական սխալները և այլն:
Գիտաժողովի շրջանակներում հանձնաժողովային դատաբժշկական փորձաքննությունների արդյունքներով փորձագիտական սխալների համակարգային վերլուծության վերաբերյալ զեկույցով է հանդես եկել Փորձաքննությունների ազգային բյուրոյի ղեկավար, ԱՆ ակադեմիկոս Ս.Ավդալբեկյանի անվան Առողջապահության ազգային ինստիտուտի դատական բժշկության ամբիոնի վարիչ, բժշկական գիտությունների թեկնածու Արգամ Հովսեփյանը:
Բյուրոյի ղեկավարն, անդրադառնալով ոչ պատշաճ բուժօգնության ցուցաբերման դեպքերի բացահայտման և հետազոտման բարդ խնդիրներին, ներկայացրել է դրանց համակարգային վերլուծության կարևորությունը,  մասնավորապես՝ ոչ պատշաճ բուժօգնության տարածվածության մակարդակի, առողջապահության ոլորտում նորմատիվ իրավական և մեթոդական ապահովման հիմնական ասպեկտների, բժշկական պրակտիկայում սխալների, թերությունների և բացթողումների կանխարգելման արդյունավետ ուղիների, բուժաշխատողների իրավական և մասնագիտական պատրաստվածության մակարդակի և այլ խնդիրների վերլուծության անհրաժեշտությունը:  
«Փորձը ցույց է տալիս, որ փորձագիտական սխալները կարող են ի հայտ գալ դատավարության տարբեր փուլերում՝ փորձաքննության նշանակումից մինչև դրա կազմակերպման և իրականացման փուլեր:
Ներկայում դատաբժշկական հանձնաժողովային փորձաքննությունների ամենաբարդ խնդիրներից է հանդիսանում բուժաշխատողի գործողության կամ  անգործության պատճառով ի հայտ եկած հետևանքների և անբարենպաստ ելքի միջև պատճառահետևանքային կապի վերլուծությունը:
Միևնույն ժամանակ, հանձնաժողովային դատաբժշկական փորձաքննությունների արդյունքների ուսումնասիրությունները վկայում են այն մասին, որ բուժաշխատողի գործողության կամ անգործության և բուժառուի առողջությանը պատճառված վնասի միջև պատճառահետևանքային կապի հաստատումը փորձագիտական հանձնաժողովի համար հանդիսանում է բարդ խնդիր, որը, ինչպես ցույց են տալիս անցկացված լրացուցիչ և կրկնակի հանձնաժողովային փորձաքննությունների արդյունքները, դատավարության նախորդ փուլերում ոչ միշտ են գնահատվում լիարժեք և բազմակողմանի»,-իր ելույթում նշել է Բյուրոյի ղեկավարը:
Ամփոփելով՝ Արգամ Հովսեփյանը մատնանշել է հանձնաժողովային դատաբժշկական փորձաքննությունների անցկացման ժամանակ պատճառահետևանքային կապերի գնահատման գործընթացի խոչընդոտները, այդ թվում  համընդհանուր կիրառվող մեթոդաբանության (ոսկե ստանդարտներ), կլինիկական ստանդարտների և բուժման չափորոշիչների ամբողջական, պարբերաբար թարմացվող բազայի բացակայությունը՝նշելով, որ առկա նորմատիվային բազան ևս լիարժեքորեն չի ապահովում հիվանդ–բժիշկ–բժշկական հաստատության վարչակազմ-դատաբժշկական փորձագետ- իրավապահ մարմիններ հարաբերությունների՝ ժամանակակից պահանջներին համապատասխան պատշաճ և լիարժեք կանոնակարգումը: Նշվածն իր հերթին թույլ չի տալիս դատաբժշկական փորձագիտական հանձնաժողովներին լիարժեքորեն վերլուծել բուժօգնության ընթացքում տեղ գտած  հնարավոր սխալների ու բացթողումների և բուժառուի  վիճակի վատթարացման կամ անբարենպաստ ելքի հետ պատճառահետևանքային կապի առկայությունը և լիարժեքորեն պատասխանել քննչական մարմինների կողմից առաջադրված հարցերին:
Կազմակերպության ղեկավարի խոսքով՝ առկա խնդիրների համատեքստում, Փորձաքննությունների ազգային բյուրոյում մշակվել և ներդրվել է փորձագիտական սխալների կանխարգելման արդյունավետ մեխանիզմներ:
Մասնավորապես, մշակվել է պատճառահետևանքային կապերի վերլուծության և փորձագիտական հետազոտությունների արդյունավետ իրականացման մեթոդաբանություն՝ պատճառահետևանքային կապերի առկայությունը կամ բացակայությունը գնահատելու համար, ինչը թույլ է տալիս ապահովել փորձագետների գործողությունների միասնականությունը, տրվող  եզրակացություններում պատճառահետևանքային կապերի գնահատման օբյեկտիվ արդյունքները և  նվազեցնել դատաբժշկական պրակտիկայում հնարավոր փորձագիտական սխալների դրսևորման մակարդակը:
«Հաշվի առնելով բժշկական գործունեության ոլորտի գիտատեխնոլոգիական զարգացման այսօրվա տեմպերը, մասնավորապես՝ նոր տեխնոլոգիաների ներդրմամբ պայմանավորված  մեր կողմից իրականացվող հետազոտություններն ու վերլուծությունները կրում են դինամիկ բնույթ և պահանջում են մասնագիտական հանրության մշտական ուշադրությունը»,-ամփոփելով խոսքը՝ նշել է Արգամ Հովսեփյանը:
Նշված թեմայով Արգամ Հովսեփյանի հեղինակած գիտական հոդվածը հրապարակվելու է միջազգային գիտաժողովի նյութերի ժողովածուում:

news

Փորձաքննությունների ազգային բյուրոն համագործակցության պայմանագիր է կնքել Ռուսաստանի խոշորագույն գիտական կենտրոնի հետ}

ՀՀ ԳԱԱ «Փորձաքննությունների ազգային բյուրո» ՊՈԱԿ-ի ղեկավար Արգամ Հովսեփյանը և ՌԴ գիտությունների ակադեմիայի Ա. Ն. Ֆրումկինի անվան Ֆիզիկաքիմիայի և էլեկտրաքիմիայի ինստիտուտի տնօրեն, քիմիական գիտությունների դոկտոր, պրոֆեսոր Ալեքսեյ Բուրյակը ստորագրել են համագործակցության պայմանագիր՝ քրեաբանության, դատաքիմիական և քիմիկոթունաբանական փորձագիտական բնագավառներում  փոխադարձ կապերի հաստատման, փոխշահավետ համագործակցության ծավալման նպատակով։
Կողմերն ընդգծել են դատաքիմիական և քիմիկոթունաբանական փորձաքննությունների բնագավառներում ժամանակակից վերլուծական մեթոդների և միջոցների արդյունավետ կիրառման, ոլորտի զարգացմանն ուղղված համատեղ գիտագործնական աշխատանքների իրականացման, բարձր որակավորում ունեցող փորձագետների պատրաստման, համատեղ գիտագործնական մոջոցառումների անցկացման կարևորությունը։
Նախանշվել են փոխգործակցության շրջանակներում իրականացվելիք աշխատանքների հեռանկարները՝   դատաքիմիական, քիմիկոթունաբանական փորձաքննությունների ժամանակակից մեթոդների՝ այդ թվում քրոմատոսսպեկտրոմետրիկ հետազոտությունների բնագավառում մեթոդական աջակցում, համատեղ գիտական հետազոտությունների կատարում, մշակված մեթոդների և մեթոդիկաների վերաբերյալ կարծիքի տրամադրում, դրանց հաստատման և փորձագիտական պրակտիկայում ներդրման իրականացում, գիտական աշխատանքների արդյունքների հիման վրա համատեղ գիտական հոդվածների հրապարակում՝ տեսական և գործնական գիտելիքների փոխանակման, դատափորձագիտական ոլորտի արդիական հարցերի վերհանման և ոլորտում առկա հիմնախնդիրների արդյունավետ լուծման համատեքստում։
ՀՀ ԳԱԱ «Փորձաքննությունների ազգային բյուրո» ՊՈԱԿ-ը կարևորում է գիտագործնական միջազգային կապերի զարգացումն ու նոր հնարավորությունների ձևավորումը՝ ի նպաստ մեր երկրի դատափորձագիտական բնագավառի գիտական ներուժի շարունակական զարգացմանն ու կատարելագործմանը։

news

Դատաքիմիական և տոքսիկոլոգիական ոլորտների հիմնախնդիրներին նվիրված միջազգային կլոր սեղան-քննարկումներ արտերկրի գործընկերների հետ}

ԳԱԱ «Փորձաքննությունների ազգային բյուրո» ՊՈԱԿ-ի  ղեկավար Արգամ Հովսեփյանի նախաձեռնությամբ հունվարի 10-ին տեսակապի միջոցով տեղի ունեցավ դատաքիմիական և տոքսիկոլոգիական բնագավառների հիմնախնդիրներին նվիրված միջազգային կլոր սեղան-քննարկում, որին մասնակցում էին Ռուսաստանի քիմիկոթունաբանական և դատաքիմիական  հետազոտությունների մասնագետների ասոցիացիայի համանախագահ, քիմիական գիտությունների դոկտոր Սերգեյ Սավչուկը, Վերոնայի համալսարանի (Իտալիա) դատական բժշկության ամբիոնի գիտական ղեկավար, պրոֆեսոր, դատաբժշկական փորձագետ, ՄԱԿ-ի Թմրանյութերի և հանցավորության դեմ պայքարի գրասենյակի (UNODC) փորձագետ Ֆրանկո Տալյարոն, ինչպես նաև Բյուրոյի և Վերոնայի համալսարանի համապատասխան բնագավառների առաջատար փորձագետներ:
Քննարկման շրջանակներում Բյուրոյի ղեկավար, բժշկական գիտությունների թեկնածու Արգամ Հովսեփյանը ներկայացրեց դատաքիմիական և քիմիկոթունաբանական բնագավառներում իրականացվող փորձագիտական հետազոտությունների շրջանակները, առկա խնդիրներն ու հնարավորությունները, այդ թվում՝ նորագույն սարքավորումային համալիրների գործարկման, նոր մեթոդների ներդրման  և արդյունավետ կիրառման հետ կապված գործընթացները՝ ընդգծելով հիշյալ բնագավառներում միջազգային փոխգործակցության զարգացման կարևորությունը:
Նախանշվեցին դատաքիմիական և քիմիոթունաբանական բնագավառներում բազմակողմ համագործակցության հնարավոր ուղղությունները, համատեղ ծրագրերի իրականացմանն ուղղված քայլերը:
Մասնավորապես Բյուրոյի դատաքիմիկական փորձաքննությունների լաբորատորիայում վերջերս ներդրված եռակի քառաբևեռ մասսպեկտրաչափի հետ համակցված հեղուկային քրոմատոգրաֆի արդյունավետ գործարկման նպատակով, հաշվի առնելով Իտալիայի գործընկերների՝ տվյալ տեսակի գերզգայուն անալիտիկ սարքավորումներով աշխատանքային փորձը, քննարկվեցին գազքրոմատոգրաֆիական և հեղուկ քրոմատոգրաֆիական մեթոդների կիրառմամբ համատեղ դատաքիմիական հետազոտություններ իրականացնելու հետ կապված մի շարք հարցեր՝ ստացված արդյունքների վերլուծության հիման վրա միասնական մեթոդաբանության մշակման  և  կիրառման նպատակով:
Քննարկվեցին նաև դատաքիմիական և քիմիկոթունաբանական փորձաքննությունների բնագավառներում կիրառվող ժամանակակից մեթոդների, փորձի փոխանակման հետ կապված հարցեր:
Արգամ Հովսեփյանը Ֆրանկո Տալյարոյին հրավիրեց Հայաստան՝ մասնակացելու ապրիլին Երևանում Բյուրոյի կողմից կազմակերպվելիք դատաքիմիական բնագավառի հիմնախնդիրներին նվիրված միջազգային կոնֆերանսին:
Նույն օրը Բյուրոյի ղեկավար Արգամ Հովսեփյանի գլխավորությամբ տեղի ունեցավ միջազգային համատեղ կլոր սեղան-քննարկում Ռուսաստանի, Բելառուսի և Մոլդովայի գործընկերների հետ, որին մասնակցում էին  Ռուսաստանի գիտությունների ակադեմիայի Ֆիզիկաքիմիայի և էլեկտրաքիմիայի ինստիտուտի տնօրեն, քիմիական գիտությունների դոկտոր, պրոֆեսոր Ալեքսեյ Բուրյակը, Ռուսաստանի քիմիկոթունաբանական և դատաքիմիական  հետազոտությունների մասնագետների ասոցիացիայի համանախագահ, քիմիական գիտությունների դոկտոր Սերգեյ Սավչուկը, Բելառուսի Ազգային հակադոպինգային լաբորատորիայի տնօրեն Յուրի Պոխոդնյան, Մոլդովայի դատաբժշկական կենտրոնի դատաբժշկական տոքսիկոլոգիայի բաժնի վարիչ Մայա Բոտեզատուն, նույն կենտրոնի դատաբժիշկ-տոքսիկոլոգ Օլեգ Կադոչնիկովը և ոլորտի այլ առաջատար փորձագետներ:
Կլոր-սեղանի շրջանակում քննարկվեցին նույն օրակարգային հարցերը, ոլորտի զարգացմանն ու գիտամեթոդական ապահովմանն ուղղված համատեղ գիտահետազոտական աշխատանքների առավել արդիական ուղղությունները: Փորձաքննությունների ազգային բյուրոն կարևորում է նմանօրինակ միջոցառումների կազմակերպումն ու միջազգային ակտիվ փոխգործակցության ծավալումը՝ ի նպաստ մեր երկրում դատափորձագիտական ոլորտի կայուն զարգացման ապահովմանը:  

news

Նոր մեթոդներ՝ թմրամիջոցների նոր տեսակների հայտնաբերման համար. ոլորտի հեղինակավոր գիտնականը Հայաստանում է}

Փորձաքննությունների ազգային բյուրոյի հրավերով Հայաստան ժամանած Ռուսաստանի քիմիկոթունաբանական և դատաքիմիական հետազոտությունների մասնագետների ասոցիացիայի համանախագահ, քիմիական գիտությունների դոկտոր Սերգեյ Սավչուկը NEWS.am լրատվական գործակալությանը տված հարցազրույցում անդրադարձել է թմրամիջոցների, հոգեմետ (հոգեներգործուն) նյութերի նոր տեսակների հայտնաբերմանը, դատաքիմիական և տոքսիկոլոգիական բնագավառում կիրառվող նորագույն մեթոդներին, այս առումով Հայաստանի ունեցած փորձին և ոլորտին առնչվող հիմնախնդիրներին:

Հարցազրույցն ամբողջությամբ կարդացեք այստեղ`news.am

 

news

Բյուրոյի դատաքիմիական փորձաքննությունների լաբորատորիան համալրվել է գերժամանակակից գերզգայուն անալիտիկ սարքավորումային համալիրով}

ՀՀ ԳԱԱ «Փորձաքննությունների ազգային բյուրո» ՊՈԱԿ-ի դատաքիմիական փորձաքննությունների լաբորատորիան միջազգային պահանջներին համապատասխան հագեցվել է նորագույն գերզգայուն անալիտիկ սարքավորումային համալիրով՝ «Agilent Technologies» ընկերության եռակի քառաբևեռ մասսպեկտրաչափի հետ համակցված հեղուկային քրոմատոգրաֆով՝ իր լրակազմով:
Սարքավորումային համալիրն ունի բազմաթիվ տեխնոլոգիական առավելություններ և հետազոտական լայն հնարավորություններ: Մասնավորապես՝ եռակի քառաբևեռ մասսպեկտրաչափի հետ համակցված հեղուկային քրոմատոգրաֆիական մեթոդի կիրառմամբ իրականացվող դատաքիմիական (քիմիկոթունաբանական) հետազոտությունները հնարավորություն են տալիս հետազոտելի կենսաբանական բոլոր տեսակի նմուշներում (այդ թվում՝ մազ, մեզ, արյուն, եղունգ, թուք, ներքին օրգաններ) սեղմ ժամկետներում և բարձր ճշգրտությամբ իրականացնել թմրամիջոցների, հոգեմետ (հոգեներգործուն) նյութերի, դեղամիջոցների, թունավոր, խիստ ներգործող նյութերի հայտնաբերմանն ուղղված գերզգայուն հետազոտություններ (նանոգրամների և պիկոգրամների ճշգրտությամբ):
Հետազոտությունների համար մշակվել և ներդրվել են նմուշապատրաստման և հետազոտման օպտիմալացված էֆեկտիվ մեթոդներ՝ բացառելու հետազոտելի նմուշների աղտոտման և սխալանքի բերող որևէ մարդածին կամ այլ գործոնների հավանական ազդեցությունը, ինչպես նաև գնահատելու հետազոտելի բարդ մատրիցային նմուշների (մազ, եղունգի եզրային կտրվածքներ) որևէ, այդ թվում՝ հսկվող նյութեր պարունակող հետքերով արտաքին աղտոտվածության առկայությունը, ինչպես նաև բացառել դրանց ազդեցությունը տվյալ նմուշներում հսկվող նյութերի և դրանց մետաբոլիտների հետազոտության արդյունքների վրա՝ ապահովելով անձի կողմից հսկվող նյութի օգտագործած լինելը հավաստող կամ բացառող արժանահավատ փորձագիտական տվյալներ:
Սարքավորումային համալիրն ունի պարբերաբար թարմացվող տվյալների բազային մշտական հասանելիություն, ինչը հնարավորություն է տալիս բարձր ճշգրտությամբ վաղ հայտնաբերել և նույնականացնել հատկապես նոր սերնդի սինթետիկ թմրամիջոցներն ու դրանց մետաբոլիտները:

Իրականացվող հետազոտությունների արդյունքում ստացված տվյալների արժանահավատությունն ապահովելու նպատակով, հաշվի առնելով դատափորձագիտական ոլորտի ժամանակակից պահանջներն ու զարգացման միտումները, Կազմակերպությունում «Agilent Technologies» ընկերության և արտերկրից հրավիրված ոլորտի բարձր որակավորում ունեցող առաջատար մասնագետների խմբի կողմից անցկացվել է փորձագիտական անձնակազմի ուսուցում և պատրաստում՝ նպատակ ունենալով զարգացնել հետազոտական գործընթացում կիրառվող սարք-սարքավորումների և ծրագրային ապահովումների միջոցով ստացվող արդյունքների ճշգրտության և ստույգության վերլուծության կարողությունները:
Իրականացվել են նաև Կազմակերպությունում առկա և նյութագիտական փորձաքնություններում կիրառվող մասս-սպեկտրոմետրով համակցված գազային քրոմատագրաֆիկ սարքավորումային համալիրի գրադարանների համալրման և թարմացման գործընթացներ, որոնք ևս հնարավորություն կտան գազային քրոմատոգրաֆիական մեթոդի կիրառմամբ իրականացնել հսկվող, այդ թվում՝ նոր շրջանառվող նյութերի, սինթետիկ թմրամիջոցների, ինչպես նաև դրանց համարժեք նյութերի (անալոգ) կամ դրանց ածանցյալների բարձր ճշգրտությամբ վաղ հայտնաբերում և նույնականացում:
Սարքավորումային համալիրի հետազոտական հնարավորությունների լիարժեք կիրառման առումով անհրաժեշտ մեթոդաբանության ներդրման ուղղությամբ աշխատանքները կրելու են շարունակական բնույթ:
Այսպիսով` Փորձաքննությունների ազգային բյուրոյում հաջողվել է ձևավորել միջազգային չափանիշներին համապատասխանող դատաքիմիական փորձաքննությունների լաբորատորիա և համալրել մեր երկրում առկա փորձագիտական հնարավորությունները՝ ապահովելով նշանակվող դատաքիմիական (քիմիկոթունաբանական) և նյութագիտական փորձաքննությունների իրականացման ժամկետների կրճատումն ու հավաստի արդյունքների ստացումը՝ ի նպաստ մեր երկրում թմրամիջոցների ապօրինի շրջանառության, թմրամոլության դեմ պայքարում դատաքննչական մարմինների գործունեության արդյունավետության բարձրացմանը:

news

«Լուրեր» լրատվականի ամփոփ անդրադարձը Փորձաքննությունների ազգային բյուրոյի 2023թ. ձեռքբերումներին և կառույցի գործունեությանը}

Առաջին ալիքի «Լուրեր» լրատվական ծրագրի կիրակնօրյա գլխավոր թողարկմանն ամփոփ անդրադարձ է կատարվել Փորձաքննությունների ազգային բյուրոյի՝ 2023թ. ձեռքբերումներին և կառույցի գործունեությանը:

Մանրամասները՝ Մուշեղ Իսախանյանի պատրաստած ռեպորտաժում:

news

Փորձաքննությունների ազգային բյուրոյում տեղի ունեցավ տարեսկզբի առաջին ընդլայնված խորհրդակցությունը}

ՀՀ ԳԱԱ «Փորձաքննությունների ազգային բյուրո» ՊՈԱԿ–ի ղեկավար Ա. Հովսեփյանի գլխավորությամբ հունվարի 11-ին տեղի ունեցավ 2024թ. առաջին ընդլայնված խորհրդակցությունը: Խորհրդակցության շրջանակներում ամփոփվեցին նախորդ տարվա ընթացքում կատարված աշխատանքների արդյունքները, ներկայացվեցին Կազմակերպության հիմնական ձեռքբերումները, զարգացման հեռանկարներն ու առաջիկա անելիքները:
Ա. Հովսեփյանը, ամփոփելով նախորդ տարվա ձեռքբերումները, նշեց, որ 2023թ. Կազմակերպությունում իրականացվել են աննախադեպ ծավալի, այդ թվում՝ բարդ, համալիր փորձաքննություններ, ձևավորվել են նոր փորձագիտական հնարավորություններ, ընդլայնվել են կատարվող փորձաքննությունների տեսակներն ու ենթատեսակները, համալրվել է նյութատեխնիկական և գիտամեթոդական բազան, կազմակերպվել են մի շարք գիտական միջոցառումներ, իրականացվել է արտերկրի գործընկերների հետ փորձի փոխանակում և այլն:
Խորհրդակցության ընթացքում փորձագիտական անձնակազմի հետ վերլուծվեցին նախորդ ժամանակահատվածներից 2024 թվական փոխանցված ընթացիկ փորձաքննությունների քանակական ծավալային ցուցանիշները, դրանց կատարման տեմպերը, առկա խոչընդոտները: Փորձաքննությունները հնարավորինս սեղմ և ողջամիտ ժամկետներում իրականացնելու և ավարտելու ուղղությամբ տրվեցին համապատասխան հանձնարարականներ։
Քննարկվեցին նաև բարդ, ծավալուն փորձաքննությունների իրականացման մեթոդաբանությանն ու դրանց առանձնահատկություններին առնչվող մի շարք կարևոր հարցեր:
Կազմակերպության ղեկավարի կողմից բոլոր փորձագիտական ստորաբաժանումների (բաժինների և բաժանմունքների) պետերին և փորձագետներին տրվեցին հստակ հանձնարարականներ՝ բոլոր ուղղություններով աշխատանքներին լրացուցիչ թափ հաղորդելու, իրենց իրավասությունների շրջանակներում անհրաժեշտ ակտիվ նախաձեռնողականություն ցուցաբերելու և առավել լավ արդյունքների հասնելու նպատակով աշխատանքներն առավել ներդաշնակ և արդյունավետ կազմակերելու և իրականացնելու համար։
Նմանատիպ խորհրդակացությունների պարբերական անցկացումը հնարավորություն է տալիս առավել բարձրացնել Բյուրոյի փորձագիտական անձնակազմի կողմից իրականացվող աշխատանքների արդյունավետությունը, վեր հանել և համակարգել առկա խնդիրներն ու դժվարությունները, առավել կառավարելի դարձնել հնարավոր ռիսկերը և ապահովել հնարավորինս սեղմ ժամկետներում գիտականորեն հիմնավորված արդյունքների ստացման գործընթացը:

news

ՀՀ ԳԱԱ «Փորձաքննությունների ազգային բյուրո» ՊՈԱԿ-ի տնօրեն Արգամ Հովսեփյանի շնորհավորական ուղերձը Ամանորի և Սուրբ Ծննդյան տոների առթիվ}

 

 

 

 

 

 

 

 

 

ՀՀ ԳԱԱ «Փորձաքննությունների ազգային բյուրո» ՊՈԱԿ-ի տնօրեն Արգամ Հովսեփյանի շնորհավորական ուղերձը Ամանորի և Սուրբ Ծննդյան տոների առթիվ

Սիրելի՛ հայրենակիցներ, հարգելի՛ գործընկերներ, ջերմորեն շնորհավորում եմ ձեզ և ձեր ընտանիքներին Ամանորի և Սուրբ Ծննդյան տոների կապակցությամբ:

Մաղթում եմ, որ 2024 թվականը դառնա առողջության, բարեկեցության, հայոց պետականության ամրապնդման, զարգացման և մեծ առաջընթացի տարի:

Փորձաքննությունների ազգային բյուրոյի համար անցնող տարին նշանավորվել է մի շարք կարևոր ձեռքբերումներով և նվաճումներով: Իրականացվել են հետազոտական հնարավորությունների համալրմանն ուղղված մի շարք քայլեր՝ անձնակազմի վերապատրաստումներ և համալրումներ, փորձի փոխանակման և բարձր պրոֆեսիոնալիզմով օժտված կադրերի պատրաստման աշխատանքներ, նյութատեխնիկական և գիտամեթոդական բազայի համալրումներ, որի արդյունքում հաջողվել է ապահովել առաջադեմ արդյունքների շարունակականությունը: Ընթացիկ տարում Կազմակերպությունում իրականացվել են աննախադեպ ծավալի, այդ թվում՝ բարդ, համալիր փորձաքննություններ, ձևավորվել են նոր փորձագիտական ստորաբաժանումներ, ընդլայնվել են կատարվող փորձաքննությունների տեսակներն ու ենթատեսակները, կազմակերպվել են մի շարք գիտական միջոցառումներ և այլն:

Ամփոփելով տարին, որը լի էր նաև բազում խնդիրներով և դժվարություններով, մեր հայրենակիցների` իրենց հայրենի տները ստիպողաբար լքելու վշտով, մաղթում եմ, որ 2024 թվականը լինի խաղաղության, մեր ժողովրդի և բոլորիս համար արդարացի լուծումների, լավատեսության և միասնական առաջընթացների տարի՝ ի նպաստ մեր երկրի հզորացման ու մեր ժողովրդի բարեկեցիկ ապագայի, ինչպես նաև դատափորձագիտական ոլորտի շարունակական զարգացման, ի շահ մեր երկրում օրենքի գերակայության ու իրավակարգի ամրապնդման:

Խաղաղություն, առողջություն և երջանկություն բոլորիս:

🎄🥂Շնորհավոր Ամանոր և Սուրբ Ծնունդ:

news

ՀՀ գիտությունների ազգային ակադեմիայի նախագահ, ակադեմիկոս Աշոտ Սաղյանի կողմից ԳԱԱ «Փորձաքննությունների ազգային բյուրո» ՊՈԱԿ-ի տնօրենի՝ գիտության գծով տեղակալ, քիմիական գիտությունների թեկնածու Պատվական Ոսկանյանը պարգևատրվել է...}

ՀՀ գիտությունների ազգային ակադեմիայի նախագահ, ակադեմիկոս Աշոտ Սաղյանի կողմից ԳԱԱ «Փորձաքննությունների ազգային բյուրո» ՊՈԱԿ-ի տնօրենի՝ գիտության գծով տեղակալ, քիմիական գիտությունների թեկնածու Պատվական Ոսկանյանը պարգևատրվել է ԳԱԱ 80-ամյակին նվիրված ոսկե հուշամեդալով՝ դատափորձագիտական բնագավառի գիտական գործունեության ապահովման գործում ունեցած նշանակալի ավանդի համար:
Փորձաքննությունների ազգային բյուրոյի ողջ անձնակազմը շնորհավորում է Պատվական Ոսկանյանին գերատեսչական պարգևի արժանանալու կապակցությամբ, մաղթում քաջառողջություն, եռանդ և հաջողություններ՝ իր արգասաբեր աշխատանքը շարունակելու, իր գիտելիքները, ունակությունները, փորձն ու կարողություններն օգտագործելու` ի շահ մեր պետության, ի նպաստ Հայաստանի դատափորձագիտական բնագավառի գիտահեն զարգացման:

news

Դատաքիմիական բնագավառի ռուս և մոլդովացի առաջատար մասնագետները մեկշաբաթյա այցով Փորձաքննությունների ազգային բյուրոյում էին}

ՀՀ ԳԱԱ «Փորձաքննությունների ազգային բյուրո» ՊՈԱԿ-ի հրավերով Ռուսաստանի քիմիական-թունաբանական և դատաքիմիական հետազոտությունների մասնագետների ասոցիացիայի համանախագահ, քիմիական գիտությունների դոկտոր Սերգեյ Սավչուկը և Մոլդովայի դատաբժշկական կենտրոնի փորձագետ Օլեգ Կադոչինիկովը մեկշաբաթյա այցով Փորձաքննությունների ազգային բյուրոյում էին՝ դատաքիմիական փորձաքննությունների բնագավառում կիրառվող ամերիկյան առաջատար «Agilent Technologies» ընկերության սարքավորումային համալիրի գործարկման, արդիական մեթոդների ներդրման, փորձի փոխանակման և համագործակցության շրջանակների ընդլայնման նպատակով:

Այցի շրջանակներում արտերկրից ժամանած մասնագետները հանդիպում-քննարկումներ են ունեցել Բյուրոյի տնօրեն Արգամ Հովսեփյանի և համապատասխան ստորաբաժանումների փորձագետների հետ: Հանդիպման ընթացքում ներկայացվել են Բյուրոյի նյութագիտական փորձաքննությունների բաժնի փորձագիտական հետազոտությունների ուղղվածությունները, առկա խնդիրներն ու հնարավորությունները, այդ թվում՝ նորագույն սարքավորումային համալիրների գործարկման և արդյունավետ կիրառման հետ կապված գործընթացները:

Փոխադարձ պայմանավորվածություններ են ձեռք բերվել համատեղ մշակելու և ներդնելու հետազոտությունների՝ գիտականորեն հիմնավորված նոր մեթոդներ և մեթոդիկաներ, ինչն էապես կբարձրացնի Բյուրոյի նյութագիտական և թունաբանական փորձագիտական ստորաբաժանումների հետազոտական հնարավորություններն ու դրանց շրջանակը՝ ապահովելով ստացված տվյալների արժանահավատությունը, ինչպես նաև կրճատելով փորձաքննությունների իրականացման ժամկետները:

Հանդիպման շրջանակներում Սերգեյ Սավչուկը Բյուրոյի տնօրենին է հանձնել ասոցիացիայի կրծքանշանն ու իր հեղինակած մասնագիտական գրքերը: Բյուրոյում գտնվելու օրերի ընթացքում իրականացվել է փորձագետների վերապատրաստում նոր ձեռքբերված՝ «Agilent Technologies» ընկերության ժամանակակից գերզգայուն անալիտիկ սարքի՝ եռակի քառաբևեռ մասսպեկտրաչափի հետ համակցված հեղուկային քրոմատոգրաֆի արդյունավետ կիրառման նպատակով: Իրականացվել է նաև փորձի փոխանակում անալիտիկ այլ, այդ թվում՝ գազքրոմատոգրաֆիկ սարքերի կիրառմամբ, վերլուծվել ժամանակակից նորարարական լուծումները, նյութագիտական և թունաբանական փորձաքննությունների բնագավառներում գործնականում ի հայտ եկող խնդիրների արդյունավետ լուծման ուղիներն ու այդ նպատակով կիրառվող մեթոդների և մեթոդիկաների կատարելագործման հետ կապված մի շարք հարցեր:

Փորձաքննությունների ազգային բյուրոն կարևորում է Կազմակերպության փորձագիտական լաբորատորիաների հետազոտական հնարավորությունների համալրման, դրանց համապատասխան գիտականորեն հիմնավորված նոր մեթոդների մշակման և շարունակական ներդրման իրականացումը՝ ի նպաստ մեր երկրում փորձագիտական ներուժի զարգացման, նյութատեխնիկական և գիտամեթոդական բազայի կատարելագործման:

news

ՀՀ ԳԱԱ «Փորձաքննությունների ազգային բյուրո» ՊՈԱԿ-ի տնօրեն Արգամ Հովսեփյանի շնորհավորական ուղերձը ՀՀ Գիտությունների ազգային ակադեմիայի հիմնադրման 80-ամյա հոբելյանի առթիվ}

Հարգարժա՛ն պարոն Սաղյան, Հայաստանի Հանրապետության գիտությունների ազգային ակադեմիայի նախագահության հարգելի՛ անդամներ, սիրելի՛ գործընկերներ, ՀՀ ԳԱԱ «Փորձաքննությունների ազգային բյուրո» ՊՈԱԿ-ի անձնակազմի և անձամբ իմ անունից ջերմորեն շնորհավորում եմ Ձեզ Ակադեմիայի հիմնադրման 80-րդ տարեդարձի կապակցությամբ:

Գիտությունների ազգային ակադեմիան իր ստեղծման օրից նշանակալի դերակատարություն է ունեցել Հայաստանի գիտական և տեխնոլոգիական ներուժի զարգացման, գիտակրթական գործունեության ձևավորման, ժամանակի պահանջներին համապատասխանող գիտաարդյունաբերական հզորությունների, գիտատեխնոլոգիական ենթակառուցվածքների ստեղծման, համաշխարհային գիտական նվաճումների և գիտության զարգացմանը նշանակալի նպաստ բերած ականավոր գիտնականների պատրաստման գործում: «Փորձաքննությունների ազգային բյուրո» ՊՈԱԿ-ը, հանդիսանալով ԳԱԱ կազմում գործող առաջատար դատափորձագիտական կազմակերպություն, ինչպես վերջին երկու տասնամյակներին, այնպես էլ հետագա տարիներին, պատրաստ է իր ներդրումն ունենալ Ակադեմիայի բարձր հեղինակության ամրապնդման և մեր երկրի գիտական կարողությունների հզորացման գործում:

Վստահ եմ, որ Գիտությունների ազգային ակադեմիայի լավագույն ավանդույթները, հարուստ կենսափորձը, ինչպես նաև ժամանակին համահունչ գործելու կարողութունն ու համախմբված աշխատանքը թույլ կտան ապահովել գիտական նոր նվաճումների շարունակականությունն ու առաջադեմ արդյունքների ապահովումը, որին պետք է իրենց ամենօրյա ջանասեր և անխոնջ աշխատանքով նպաստեն ԳԱԱ համակարգում գործունեություն ծավալող բոլոր գիտնականները՝ պատվախնդիր ծրագրերի և գաղափարների իրագործմամբ:

Եվս մեկ անգամ շնորհավորում եմ բոլորիս այս նշանավոր հոբելյանի առթիվ։ Մաղթում եմ ԳԱԱ համակարգի բոլոր գործընկերներին արգասաբեր աշխատանք, անկոտրում կամք և վճռականություն՝ գիտությունների ազգային ակադեմիայի փառավոր ավանդույթները շարունակելու, մեր երկրի արժանավոր գիտնականների նոր սերունդներ պատրաստելու նվիրական գործի իրականացման համար՝ ի փառս մեր երկրի, ի շահ Հայաստանի գիտության հզորացման և գիտելիքահեն առաջընթացի ապահովման։

Հարգանքով՝ ՀՀ ԳԱԱ «Փորձաքննությունների ազգային բյուրո» ՊՈԱԿ-ի տնօրեն, բ.գ.թ. Արգամ Հովսեփյան

news

ՀՀ ԳԱԱ «Փորձաքննությունների ազգային բյուրո» ՊՈԱԿ-ի տնօրեն Արգամ Հովսեփյանի շնորհավորական ուղերձը փաստաբանների օրվա առթիվ}

Հարգելի՛ պարոն Բաբայան, «Փորձաքննությունների ազգային բյուրո» ՊՈԱԿ-ի ողջ անձնակազմի և անձամբ իմ անունից սրտանց շնորհավորում եմ Ձեզ և փաստաբանական ողջ համայնքին մասնագիտական տոնի և Հայաստանում փաստաբանության ստեղծման 105-ամյակի առթիվ։

Փաստաբանությունը, հանդիսանալով քաղաքացիական հասարակության կարևորագույն ինստիտուտ, առանցքային դերակատարում և ազդեցություն ունի իրավական պետության, ժողովրդավարական ինստիտուտների կայացման, մեր երկրում իրավակարգի պահպանման, անձանց իրավունքների և ազատությունների պաշտպանության հարցում:

Փաստաբանական համայնքը մեր երկրի ամենահեղինակավոր և կայացած ինստիտուտներից է, ինչի վկայությունը փաստաբանների նկատմամբ հանրային բարձր վստահությունն է:

Որքան պաշտպանված և անկախ է փաստաբանը, այնքան բարձր է նրա կողմից իրականացվող իրավունքների, ազատությունների և շահերի պաշտպանության որակը: Ժողովրդավար հասարակությունում փաստաբանը պետք է գնահատված ու պաշտպանված լինի, ինչի գլխավոր երաշխավորը պետությունն է:

Հայաստանի փաստաբաններին մաղթում եմ մասնագիտական նոր ձեռքբերումներ, իրավապաշտպան գործունեության մեջ՝ անկոտրում կամք և վճռականություն:

Խաղաղություն, առողջություն և ամենայն բարիք ձեզ և ձեր ընտանիքներին:

Հարգանքով՝ «Փորձաքննությունների ազգային բյուրո» ՊՈԱԿ-ի տնօրեն Արգամ Հովսեփյան

news

Փորձաքննությունների ազգային բյուրոն շարունակում է դատագենետիկական փորձաքննությունների բնագավառում միջազգային համագործակցությունը}

Միջազգային առաջատար «GTH DNA» խորհրդատվական կազմակերպության Կենտրոնական Ամերիկայի, Եվրոպայի և ԱՊՀ երկրների տարածաշրջանային տնօրեն Կայլ Շրոյդերը, «ThermoFisher scientific» ընկերության տարածաշրջանային ներկայացուցիչ Սատենդրա Կումարը, Վրաստանում «ThermoFisher scientific» ընկերության ներկայացուցիչ Ակակի Պետրիաշվիլին և վրացական «ABM» ընկերության ներկայացուցիչ Վաժա Գելիաշվիլին նոյեմբերի 29-ին այցելել էին Հայաստան՝ ՀՀ ԳԱԱ «Փորձաքննությունների ազգային բյուրո» ՊՈԱԿ, դատագենետիկական փորձաքննությունների բնագավառում համագործակցության կապերի ամրապնդման, միջազգային լավագույն փորձի  տեղայնացման հետ կապված մի շարք կարևոր հարցերի քննարկման և հետագա փոխգործակցության շրջանակների ընդլայնման նպատակով:
Այցի շրջանակներում հանդիպում է տեղի ունեցել  Բյուրոյի տնօրեն Արգամ Հովսեփյանի և կազմակերպության ղեկավար ու փորձագիտական անձնակազմի հետ: Ի թիվս երկուստեք հետաքրքրություն ներկայացնող օրակարգային հարցերի, քննարկվել են  դատագենետիկական փորձաքննությունների բնագավառում փոխգործակցության շրջանակներն ու կարևոր ուղղությունները, մասնավորապես՝ ԴՆԹ տվյալների բազաների ձևավորման, քաղաքականության մշակման, անհրաժեշտ օրենսդրական կարգավորումների մշակման և կատարելագործման ապահովման, ինչպես նաև ԴՆԹ հետազոտությունների լաբորատորիայի որակյալ գործունեության ապահովման վերաբերյալ:
Դեռևս այս տարվա հունիսին Թբիլիսիում միջազգային սիմպոզիումին մասնակցության շրջանակներում Բյուրոյի տնօրեն Արգամ Հովսեփյանի և ԱՄՆ գործընկերոջ՝  «GTH DNA» խորհրդատվական ընկերության ղեկավար Թիմ Շելբերգի հետ ձեռք բերված պայմանավորվածության համաձայն, որի արդյունքում կայացավ միջազգային գործընկերների այս այցը, քննարկվել են նաև Հայաստանում դատագենետիկական փորձաքննություններին և ԴՆԹ տվյալների բազայի ձևավորմանն առնչվող խնդիրների շուրջ Հայաստանում համատեղ միջազգային  սիմպոզիումի կազմակերպման հետ կապված հարցերը:
Հյուրերը շրջայց են կատարել նաև Փորձաքննությունների ազգային բյուրոյի փորձագիտական ստորաբաժանումներում, տեղում ծանոթացել ԴՆԹ նույնականացման դատագենետիկական լաբորատորիայի հնարավորություններին, այդ թվում՝ նորագույն սարքավորումային համալիրների գործարկման և արդյունավետ կիրառման հետ կապված ընթացակարգերին:
Հիշեցնենք, որ 2023 թվականի մարտ ամսից Փորձաքննությունների ազգային բյուրոյում միջազգային չափանիշներին համապատասխան իրականացվում են կենսաբանական ծագման բոլոր տեսակի նմուշների
ԴՆԹ նույնականացման դատագենետիկական փորձաքննություններ՝ գրանցելով առաջադեմ արդյունքներ:
Փորձաքննությունների ազգային բյուրոն կարևորում է դատագենետիկական փորձաքննությունների ոլորտում առկա միջազգային նորագույն հնարավորությունների և փորձի ներդրման նպատակով միջազգային գործընկեր կառույցների հետ ակտիվ համագործակցության ծավալումը՝ ի նպաստ Հայաստանի Հանրապետությունում դատափորձագիտական գործունեության տվյալ ուղղության շարունակական զարգացմանը, փորձագիտական հնարավորությունների կատարելագործմանն ու հավաստի արդյունքների ապահովմանը։